Om stillinga

Vi ser etter deg som likar å arbeide med tal og ha dialog med andre.

Planavdelinga i KDD har ledig ei fast stilling med oppgåver knytt til internbudsjett, verksemdsplanlegging og avdelinga sitt arbeid med statsbudsjettet. Stillinga har ein spennande portefølje der du kan vere med å utvikle den offentlege forvaltninga for framtida. 

Du blir også involvert i koordineringa av løpande bestillingar på våre område, og du får arbeide med oppfølging av tilskot til kompetansetiltak innan planlegging. I stillinga ligg det også å  koordinere PLANs arbeid med nordisk samarbeidsprogram 2025-2030 for regional utvikling og planlegging.

Stillinga er i seksjon for verksemdsplanlegging og kompetanse. Med deg blir vi sju tilsette i seksjonen. Seksjonen har ansvar for strategisk og heilskapleg styring av prosessar knytt til oppfølging av økonomi og organisasjonsutvikling, politiske styringsdokument og verksemdsplanlegging. Miljøet i seksjonen er prega av høgt fagleg engasjement og samarbeid på tvers, der alle bidreg både i rutine- og utviklingsoppgåver. Vi jobbar med tilskotsforvaltning, og dessutan forsking og utvikling for å styrkja plankompetansen. I tillegg jobbar vi med ekstern og intern kommunikasjon gjennom mellom anna nettsider som planlegging.no. Vi koordinerer mange av prosessane og leveransane til planavdelinga, og nokre internasjonale saker. 

Seksjonen er ein del av planavdelinga i Kommunal- og distriktsdepartementet, som til saman har 46 tilsette.

Arbeidsområde

I denne stillinga blir du ein del av seksjon for verksemdsplanlegging og kompetanse. Arbeidsoppgåvene dine vil mellom anna vera å

• bidra til å sikra ryddige leveransar til statsbudsjettet 
• koordinera PLANs arbeid med nordisk samarbeidsprogram 2025-2030 for regional utvikling og planlegging
• bidra til godt innhald på planlegging.no og andre kommunikasjonskanalar
• følge opp oppgåver knytt til avdelingas internbudsjett
• koordinere bestillingar av faktaflak til politisk leiing
• legge til rette for god verksemdsplanlegging i PLAN 
• bidra til arbeidet med å styrke plankompetansen- og kapasiteten, mellom anna gjennom tilskotsordning og kunnskapsspreiing. 
• vidareutvikle tiltak på kompetansefeltet innanfor planleggingsfaga 
• levere på andre løpande oppgåver og bestillingar

Kvalifikasjonar

Vi søker deg som har:

• relevant høgare utdanning, helst på masternivå innan økonomi, samfunnsfag, statsvitskap, sosiologi eller liknande
• relevant erfaring
• erfaring frå eller god kjennskap til offentleg forvaltning, med god forståing for kva det vil seia å jobba i eit departement
• innsikt i statsbudsjettarbeid
• svært god norsk skriftleg (vi skriv på begge målformer) og munnleg framstillingsevne, og dessutan god talforståing
• meistrar digitale verktøy som Office-pakken mm.

Det er ønskeleg at du har:

• erfaring med å skrive gode bestillingar og følge opp desse
• kjennskap til økonomiregelverket i staten, tilskotsforvaltning og planlegging etter plan- og bygningslova

Personlege eigenskapar

For å trivast og lykkast i denne stillinga, ser vi for oss at du

• har evne til å sjå heilskap, prioritera og planlegge strategisk
• er ein god prosessleiar, som held god struktur og er nøyaktig
• sjølvstendig og sjølvgåande, men også ein lagspelar
• du ser moglegheiter og bidreg til konstruktive diskusjonar 
• har gode kommunikasjonsevner og bidreg til eit positivt arbeidsmiljø

Personlege eigenskapar vil bli tillagt stor vekt.

Utdanning og erfaring må dokumenterast med CV, vitnemål og attestar.

Vi tilbyr

Vi ønskjer deg velkomen inn i eit arbeidsfellesskap med dyktige kollegaer som er stolte av jobben sin. Vi tilbyr

• kompetanseutvikling i eit sterkt fagmiljø 
• fleksibel arbeidstid, betalt overtid og sommartid 
• arbeidsplass sentralt i Oslo sentrum 
• moglegheit for trening i arbeidstida 
• medlemskap i Statens pensjonskasse med gode låne- forsikrings- og pensjonsordningar 
• eit aktivt sosialt miljø med mange tilbod til dei tilsette, eige bedriftsidrettslag og bedriftshelseteneste 

Som ny i KDD får du heilt frå starten av oppgåver som utfordrar deg, og du får ein fadder som følger deg opp. Departementet har eit introduksjonsprogram der du blir kjend med nytilsette i dei andre avdelingane. For tilsette under 40 år er det ei eiga foreining, Ung i KDD. Nettverket skal bidra til å skape ein arena der unge i departementet kan møtast jamleg til faglege og sosiale samankomstar. Ønskjer du å vite meir om korleis det er å jobbe hos oss, kan du lese meir her.

Løn: kr 600 000 – 780 000 i stilling som rådgivar (1436) eller seniorrådgivar (1364). Stillingane blir lønna iht. hovudtariffavtalane i staten og KDD sin lokale lønspolitikk. Stillings- og lønsplassering avheng av erfaring og kvalifikasjonar. For spesielt kvalifisert søkarar kan høgare løn vurderast.

Som hovudregel krevst det tre års relevant erfaring for å bli rådgivar, og fem års erfaring for å bli seniorrådgivar. 

Autorisasjon: Tilsette i Kommunal- og distriktsdepartementet må kunne autoriserast for tilgang til informasjon BEGRENSET etter sikkerheitslova. Les meir om autorisasjon her: https://nettsteder.regjeringen.no/jobbikdd/rekrutteringsprosessen/

Slik søkjer du

Send søknad elektronisk via lenkja «Søk stillinga» øvst på denne sida. 

Vi er opptekne av kva du kan, erfaringane dine og kompetansen du har, og vil derfor stille deg nokre faglege spørsmål, framfor å be deg skrive ein søknadstekst. Når du trykker på "Søk stillinga", kjem du til rekrutteringsportalen og må logge inn. I portalen er det viktig at du: 

• Svarar på spørsmåla du får innleiingsvis. Spørsmåla erstattar søknadsbrev/tekst.
• Fyller ut CV-felta i portalen (sjølv om du legg ved ein ferdigutfylt CV). Dette er nødvendig for bl.a. å vareta kravet om fullstendige søkjarlister. 

Vi meiner at inkludering og mangfald er ein styrke. Vi ønskjer medarbeidarar med ulike kompetansar, fagkombinasjonar, livserfaring og perspektiv for å bidra til endå betre oppgåveløysing. Vi vil legge til rette for medarbeidarar som har behov for det. Aktuell tilrettelegging kan til dømes vera tekniske hjelpemiddel, tilpassing av møblar eller endring av rutinar, arbeidsoppgåver og arbeidstid. Les meir om inkludering og mangfald her. 

KDD nyttar Semac bakgrunnssjekk i gjeldande rekrutteringsprosess. Bakgrunnssjekk blir utført etter samtykke frå kandidaten, og inneber mellom anna at vi verifiserer CV og annan søknadsdokumentasjon i samband med tilsetjinga. Tilsetjing føreset godkjend bakgrunnssjekk. 

I samsvar med offentleglova §25 gjer vi merksam på at opplysningar om søkjaren kan bli offentleggjorde sjølv om søkjaren har bede om å ikkje bli ført opp på søkjarlista. 

Kontaktperson: For nærmare opplysningar om stillinga, kontakt  Hanne Bakke på e-post Hanne.Bakke@kdd.dep.no eller tlf. 913 04 313. For spørsmål om rekrutteringsprosessen kan du ta kontakt med rekrutteringsrådgivar i DSS Tale Fredriksen på e-post Tale.Fredriksen@dss.dep.no eller tlf. 908 43 773. 

Vi ser fram til å høyra frå deg!