Kunnskap som formar samfunnet

Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.

Vil du vere med å forme framtida?

. Video: https://youtu.be/M5n6RnScNgA

Forskar (1108) ved Institutt for framandspråk

Velkomen som søkjar til ei 80 prosent stilling som forskar (1108) ved Institutt for framandspråk. Tilsetjingsperioden er eitt år, med start 1. august eller så snart som råd. 

Institutt for framandspråk har ni ulike språk, og undervisning og forsking vert gjennomført innanfor disiplinane språk/lingvistikk, litteratur, kulturstudium og didaktikk. Instituttet har om lag seksti faste vitskaplege tilsette, rundt tjue ph.d.- og postdoktorstillingar og elleve administrativt tilsette.

Om prosjektet:

Stillinga er knytt til det pågåande forskingsprosjektet DARKLAX: "The Dark Side of Sustainability: Norway and the Rise and Fall of Salmon Farming in Chile. A Transnational History of the Future (1970-2030)",leia av førsteamanuensis Ernesto Semán. Finansieringa kjem frå FRIPRO-programmet ved Noregs forskingsråd.

DARKLAX fokuserer på omdanninga av lakseoppdrettsnæringa i Chile sidan 1970-talet, og ser på endringar i miljø, sosiale relasjonar, kjønn og teknologi. Eit transnasjonalt perspektiv er ein sentral del av det konseptuelle rammeverket til DARKLAX, som plasserer det chilenske sør som sentrum for globale krefter.

Kvalifikasjonar og personlege eigenskapar:

• Søkjaren må ha mastergrad eller tilsvarande utanlandsk grad i latinamerikastudiar, historie, litteratur, filmstudiar, miljøstudiar eller eit anna relevant felt innanfor humaniora. Doktorgrad innanfor eitt av desse felta er ein føremon, men ikkje eit krav.
• Dokumentert erfaring i produksjon av visuelle essay/dokumentarar og minst eitt slikt visuelt essay/dokumentar publisert i eit akademisk tidsskrift er eit krav.
• Inngåande kjennskap til latinamerikansk historie og kultur.
• Arbeid med kjønnsperspektiv, og publikasjonar innanfor dette feltet, er ein føremon.
• Kjennskap til norsk språk er ein føremon.
• Forskaren må ha kjennskap til relevant historisk metode, kjønnsteori og teoriar knytt til studiar av dyr, berekraft og antropocen, og bruka desse perspektiva i essaya. 

I tillegg til desse kvalifikasjonane vil det bli lagt vekt på fagstrategiske omsyn, motivasjon, samarbeidsevner, og til at søkjaren er personleg eigna.

Det blir lagt til grunn at den tilsette har sin daglege arbeidsplass ved Institutt for framandspråk, Universitetet i Bergen, og rettar seg etter dei retningslinjene som til ei kvar tid gjeld for stillinga.

Arbeidsoppgåver og ansvar:

Forskarens rolle er å utvikle to visuelle essay/dokumentarar om sentrale sider ved historia om lakseoppdrett i Chile:

• Visuelt essay 1 om den nye ekspansjonen av laksepopulasjonen på den sørlege halvkula etter at oppdrettslaks rømde ut i naturen. 
• Visuelt essay 2 om korleis teknologi og kjønn har forma forholdet mellom arbeid og natur i lakseoppdrettsnæringa frå byrjinga på 1970-talet til i dag. 

Hovudoppgåva til forskaren er å laga dei visuelle essaya gjennom historiske undersøkingar, innsamling av materiale og analyse av funna.

Forskaren vil arbeide tett med Læringslaben ved UiB, som vil hjelpe med teknisk produksjon og redigering, i tillegg til å samarbeide med the Environmental Humanities Research Group om filmen.

Forskaren skal koordinere filminga i Noreg og Latin-Amerika. Vedkomande vil samarbeide med DARKLAX sine tre sentrale partnarinstitusjonar i utforminga av det konseptuelle og historiske perspektivet i filmane, og i arbeidet med filmane elles: Universidad Diego Portales i Chile, Universidad de San Martín i Argentina og Arne Næss Center for Ecology and Philosophy i Noreg. 

Forskaren skal òg sende inn filmane til publisering i høgt rangerte akademiske tidsskrift, og til relevante prisutdelingar, filmfestivalar og liknande. Vidare skal forskaren delta i arbeidet med den første internasjonale konferansen og arbeidssamlinga på DARKLAX-prosjektet i mai 2026, og dessutan delta i andre relevante aktivitetar knytt til prosjektet.

Vi kan tilby:

• Eit godt og fagleg utfordrande arbeidsmiljø.
• Brutto årsløn tilsvarande 605000-670 000 NOK (kode 1108) i ei fulltidsstilling. Vidare lønsopprykk skjer etter ansiennitet i stillinga. For særleg kvalifiserte søkjarar kan det bli aktuelt å vurdere høgare løn. 
• Medlemskap i Statens pensjonskasse.
• Gode velferdsordningar.

Slik søkjer du stillinga:

Søknaden skal sendast elektronisk via lenka «SØK STILLINGA». Søkjaren må nytte det elektroniske CV-skjemaet. Søknaden skal innehalde:

• søknadsbrev med ein kort omtale av søkjaren sine relevante forskingsinteresser og erfaring, og av motivasjonen for å søkje stillinga
• CV
• ei liste over eventuelle publikasjonar i ditt namn, og lenker til produserte og/eller publiserte visuelle essay i ditt namn
• vitnemål og utskrifter som dokumenterer fullført bachelor- og mastergrad. Dette må inkludere informasjon om omfanget av mastergraden i ECTS credits. Omfanget må vere dokumentert i eit offisielt dokument som stadfester at dette gjeld ditt studium, og som er skrive ut av institusjonen du har utdanninga frå.
• kort samandrag av masteroppgåva eller liknande avhandling (inntil tre sider)
• namn og kontaktinformasjon til tre referansepersonar

Søknaden skal vere på engelsk. Dokumentasjon og vedlegg kan vere på norsk, eit anna skandinavisk språk eller engelsk. Dokumentasjon på andre språk enn dette må følgjast av attesterte omsetjingar til engelsk eller eit skandinavisk språk.

Vedlegga kan vere i Word- eller PDF-format og må lastast opp i Jobbnorge innan søknadsfristen.

Aktuelle søkjarar vil bli kalla inn til digitalt intervju.

Nærare om tilsettingsprosessen her. 

Generell informasjon:

Utfyllande opplysningar om stillinga kan ein få frå instituttleiar Martin Paulsen, e-post m.paulsen@uib.no eller telefon 55582386, eller prosjektleiar Ernesto Semán, e-post ernesto.seman@uib.no.

Spørsmål om den elektroniske søknadsprosessen kan rettast til Det humanistiske fakultet på e-post: fakadm@hf.uib.no.

Universitetet i Bergen nyttar meirinnsyn ved tilsetjing i vitskaplege stillingar. Opplysningar om søkjaren kan bli gjort offentlege sjølv om vedkomande har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden, kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.